12/04/2010

Ang Repolyo at ang Uod, Vow!

"eeeeeehhhhhhh!!!!!!!!~ May bulate!!!", reklamo ng nanay ko sa kaharap nitong repolyo. Kung nakakapag salita lamang ang gulay ay sinabi na nitong, "sorry naman..."


Oo na Nay! ikaw na! ikaw na ang magaling mag-gulay ng repolyo! "Dapat kasi talaga dito sa reployo hinihimay ng mabuti ang bawat dahon, hindi pwedeng hiwain kasi baka nga may madamay na bulate sa paghiwa mo." Bulate 101 mula kay Inay. Gusto kong sabihin na ulam ang hinihingi ko, hindi repolyong dinapuan ng kung ano. Agad nitong ininit ang kagabing ulam. Magluluto pa raw kasi siya kaya yung ininit na lang na ulam ang kainin ko. OK fine! May magagawa ba ko? Gutom na ko eh. Heto nga't kumakain na ko habang nagsusulat. May pasok na kasi ako ulit mamayang gabi. Isang araw lang ang off ko. Nakakapraning na 'tong trabahong to. Kahit nanay ko nababaliw na sa schedule ko. Akala nya kasi ay sa Linggo pa pasok ko. Samahan mo pa ng karimarimarim na uod kanyang gugulayin.

Pero sa loob-loob ko, mabuti na rin lang at malinaw ang kanyang mga mata pagdating paghihimay ng pagkain. Pareho kasi kaming maselan pagdating sa kinakain. Mabuti naming sinusuri ang bawat sangkap upang alamin kung anong alien ang naninirahan dito. Kapag nasigurado na ngang wala nang impostor sa naturang pagkain ay maigi namang huhugasan ang paglalagyan ng mga pagkain at paglulutuan nito. Siguro kung nagtatrabaho ako sa restaurant bilang tagahugas ng mga pinggan ay agad akong masesesante dahil sa kupad kong mag hugas ng mga plato at baso. Sinisigurado ko kasing walang naiwang bakas ng nakaraan sa mga hinuhugasan ko. Kapag naghuhugas ako ng pinagkainan ay talo ko pa ang naglalaba. Mauubos ko ang laman ng tangke ng tubig sa buong subdivision bago pa ako matapos. Kung pwede lang purified at sterilized ang tubig na gamitin kong panghugas ay gagamitin ko.

Minsan na nga akong sinita ng kapatid at pinsan ko dahilan ng inabot na ako ng isang oras sa paghuhugas ng pinagkainan naming tatlo. Take note: tatlong plato, kutsara't tinidor, at mga baso. Hindi ko rin lubos maisip na isang oras na pala ang lumipas at nagbabanlaw pa rin ako. "Kung natatagalan kayo, kayo mag hugas di yung utos kayo ng utos!", yan ang reply ko nung nainis ako sa comment nilang makupad daw akong maghugas ng pinggan. Sa bagay, may katotohanan naman yung sinabi nila. Kaya lang nakakaasar na utos ng utos tapos ang daming reklamo. Isa pa naman sa mga prinsipyo ko yung, "If you want something done, do it yourself." Di ko lubos maalala pero parang sa telenobela ko ata nakuha tong linya na to. Sa pagkakaalam ko ay si Princess Punzalan ata ang nagbitaw ng mga katagang iyan sa isang telenobela na pinapanuod ng nanay ko nung High School pa ko. Tumatak yan sa utak ko kasi ganyan na ganyan talaga ang prinsipyo ko. Di ako mahilig mag utos pag alam kong tatanga-tanga ang pag-uutusan ko. Ilang beses na rin kasi akong ginawang utusan ng panganay kong kapatid nung bata pa ko (actually hanggang ngayon din naman eh, medyo nabawasan na nga lang). Sa pagdalas ng utos nya ay pagdalas din ng pagkakamali ko. Kung mag utos naman kasi sila akala mo alam na ng limang-taong gulang na bata ang lahat ng bagay sa mundo. Tapos magagalit kapag mali ang ginawa kesa sa iniutos na gawin. Eh yun yung pagkakaunawa ng tao eh, anong magagawa mo? Kaya dapat, kung ayaw mo ng mali dahil perfectionist ka, ikaw ang gumawa! Kaya hindi ako pwedeng maging Supervisor, Manager, Presidente ng Pilipinas. Ang tendency kasi ako ang gagawa ng lahat ng gusto ko dahil may mga bagay na sadyang mahirap ipaunawa sa ibang tao. Pero madalas ay may mga tao din naman na sobrang husay. Hindi man talino ang tawag dun kundi "husay" talaga. Kaya nyang gawin at alam nyang gawin ang mga gusto mong mangyari. Pag ganon ang mga tauhan ko, payag na ko maging leader.

Kamusta na kaya ang uod ngayon? Nasaang lupalop na kaya siya? Parang ayoko na lang isipin dahil baka bigla nya kong dalawin mamaya sa pagtulog ko. Magising na lang ako bigla na hinahabol ako ng isang repolyo at ng mga kampon nyang bulate. ewwww~

No comments:

Post a Comment